Mia sollt´s niad glam und doch is woahr
Wos se zoutrong hout voa edle Joahr.
Z´Poppenriad is gwen in oina Nacht
Und d´Leit hom drüwa niad schlecht g´lacht.

Da Vüastand vo da Feiaweah
Hout Sitzung g´hat und hult´s alle hea.
Sei ganze Leit - im Hiast bringt mas äia zamm,
Weils nimma so vül Oawat ham.
As Prodakol, dös woa reat grouß
Und in da Wiatsstum woas reat hoaß.
vom dischbadian un dem vül red´n,
San´s alle in da Häih drum gwen.
Döi Hitz mou g´löscht wern, loußt se denk´n,
Da Wiat kummt kamats nouch min schenk´n.
Und bis döi Sitzung as is gwen
Hout jeder allas doppelt g´seng.

Na endle, so nou Middanacht,
Hom sa se alle hoimwats g´macht.
Wöis assa san vo de "Drei Moah´n"
Is hintan Beach a Räit´n woan
wöist as so leicht houst nu niad g´seng.
Dou sans glei allzamm nöichtan gwen.
Da Kummandant schreit: Seaht´s döi Hell´n,
Dou brennt do glei ganz Kamasöl´n.
Döit´s d´Spritzn assa und spannts äi,
Dou möima üwe, üwa d´Häih.

Da Sepp houts Spritznhaus aufgspiad,
Da Michl, dea hout Gaal äig´schiert.
Nou gäihts dahi, mit "wißt" und "wiah" -
Da Sepp moint: "Huacht´s wen i recht siah,
Döi Rait´n kummt ma allawail gräißa vüa.
Des is a Feia, mei o mei,
Dou wiad nimma vül zum rett´n sei".

Da Michl hout auf Gaal äigschlon´g
Da Stoi und Funk´n han grod gflon´g.
"Halts - öitsa schau`n ma oi - wos moint´s wos is"???
Da Mouh zeigt ihnan her sei G´fries.
As brennt goua niad in Kamasöln,
Des kummt vom Mouh, döi ganze Hell´n.
Weil der so aafgäiht, bloude roat,
Und d´Wolk´n a mit a´gleicht hout.
Dös is döi Räit´n, des is döi Hell´n,
Und ruich liegt drunt Kamasöln.

I´kann enk song, döi hom da g´floucht,
Und schleine homs an Hoimwech g´sucht.
Ganz langsam san´s ins Doaf eig´foahn,
Damit ja nemats wach is woan.
Doch wöis so gäiht, enk wißt´s ses ja,
Niad jeda s´Maal a haltn ka´.
Im ganzn Doaf, des woa a G´frett,
Hoat ma vo nix andan g´redt.
Als vo den Brand in Kamasöln,
und wöis in Mouh hom löschn wölln.

Mundartgedicht, 1958 von Volkstumswart Hans Binder (verstorben 1987) verfaßt.