Verse 22253-22307 (Ausg. G. Ehrismann, Bd. III, Neudr. Berlin 1970, 220-222)
Von manigerlei sprâche
22253 Swer tiutsche wil eben tihten,
Der muoz sîn herze rihten
22255 Uf manigerleie sprâche;
Swer wênt daz die von Ache
Reden als die von Franken,
Dem süln die miuse danken.
Ein ieglich lant hât sinen site,
22260 Der sînem lantvolke volget mite.
An sprâche, an mâze und an gewande
Ist underscheiden lant von lande.
Der werlde dinc stêt über al
An sprâche, an mâze, an wâge, an zal.
22265 Swâben ir wörter spaltent,
Die Franken ein teil si valtent,
Die Beier si zezerrent,
Die Düringe si ûf sperrent,
Die Sahsen si bezückent,
22270 Die Rînliute si verdrückent,
Die Wetereiber si würgent,
Die Mîsener si vol schürgent,
Egerlant si swenkent,
Oesterrîche si schrenkent,
22275 Stîrlant si baz lenkent,
Kernde ein teil si senkent,
Bêheim, Ungern und Lamparten
Houwent niht mit tiutscher barten,
Franzois, Walhe und Engellant,
22280 Norweye, Yberne sint unbekant
An ir sprâche tiutschen liuten;
Nieman kan ouch wol bediuten
Kriechisch, jüdisch und heidenisch,
Syrisch, windisch, kaldêisch:
22285 Swer daz mischet in tiutsch getihte,
Diu meisterschaft ist gar ze nihte.
Die lantsprâche dâ vor genant
In tiutschen landen sint bekant:
Swer ûz den iht guotes nimt,
22290 Daz wol in sînem getihte zimt,
Mich dünket dern habe niht missetân,
Tuot erz mit künste und niht nâch wân.
Wenne Westfalen und manigin lant,
Diu hie belibent ungenant,
22295 In Tiutschen landen sint bekant,
Aleine si maniger zungen hant
Würgen, zwicken und binden
Vorn, mitten und hinden.
Wenne T und N und R
22300 Sint von den Franken verre
An maniges wortes ende:
Wer wil dâr üm si pfende,
Ob Swanfelder ir wörter lengent
Und Babenberger ir sprâche brengent
22305 Von den hülsen ûf den kern?
Ein ieglîch mensche sprichet gern
Die sprâche, bî der er ist erzogen.