Dr Moschtdiab en dr Marderfall
Briader sei ond Nochber sei, des duat selda guat
Hot dr oi dr Moscht ond Woi, no kriagt dr ander d`Wuat
Ond wemmer gar, Du liaber Gott
Dr Keller mitanander hot
No gohts et lang, no kommat Glischda
Z`letschda au beim beschda Chrischda.
So isch au em Hannes ganga
Wollt ällfort noch`m Moschtkruag langa
Doch des isch au a grauß Malheur
Er hot nex mehr,sei Faß isch leer.
Drom hot er denkt, der alte Schpond
Häb jeder Mensch a schwacha Schtond
No hot er halt, von dem isch d`Red
No mai so schwache Schtonda k`hed.
Kurz ond guat, ganz ohne Gschpaß
Er goht seim Bruader Gottliab henters Faß.
Er hot sich wochalang scho g`schtärkt
No erscht hot`s sei Bruader, der Sembl, g`merkt.
Omso graißer, s`leit em Bluat
Isch nadirlich dem sei Wuat.
Der goht na en Hennaschtall
Ond hollt sei graußa Marderfall.
Dui schtellt er uff vor seim Faß
Er sieht ganz grea ond blau vor Haß.
Doch s`goht et lang, s`isch beinoh Nacht
Do kommt dr Hannesle ganz sacht
Goht d`Schtiaga na, doch halba donda
Hot dr Lomp a Liacht a`zonda.
Der sieht des Deng ganz g`schbäßig a
No hot er g`lächld vor sich na
S`hot em aber doch verdrossa
Drom b`sennt sich dr Hannes au uff en graußa Bossa.
Ond liabe Leit, was soll i sa
Do ziagt dr Hannes d`Hosa ra
Sitzt iber d`Fall na, oh Graus
Ond druckt dr schenschde Kaktus naus.
Der Kaktus aber, ond des isch die G`schicht
Isch a Bissle z`schwer em Gwicht
Drom schnappt dui Fall, oh Weh, oh Weh
Wia dr Blitz so schnell en d`Heh
Verwischt vom Hannes no an Doil
Sei Glocka samt em Glockasoil.
Der rennt em Keller rom wia bissa
Ond schreit "Ach hätt i doch et g`schissa".
Hot a Doa ond a Gfuchdl g`het
Grad wia wenn er Foxtrott danza dät.
Der ziagt ond druckt ond goht schier druff
Doch dui Fall goht halt et uff.
Doch wia ner no so ommra druckt
Do hot sei Weib scho noch em guckt.
Dui lasst en Donderschroi glei naus
Ond sait "Jetzt do siehts doch sauber aus".
Doch z`letschda moint se halt au
Mit vereinte Kräft sot`s doch no gau.
No hänt se zu zwoit dra ommra zoga
Ond hent schier s`ganze G`schtell verboga.
Dr Hannes z`letschda dr Muat verliert ond sait, oh Weib komm laß dr`s sa
"Gang nuff ond holl dr Gottliab ra".
Dr Gottliab der kommt ra ganz schnell
Ond macht dui Fall weg von dera Schell
Dui sieht aus grea ond blau verschwolla
Hot Farba wia a Regaboga, dr Deifl soll dui Falla holla.
Dr Gottliab hot`s em Schtilla g`fraid
Drom hot er zu seim Bruader Hannes g`sait
S`isch d`Stroaf denn du muascht ewig wissa
Weil D`mr hoscht uff`d Falla g`schissa
Weil ällfort bischt so dapfer gloffa
Ond hoscht mr ell mein Moscht weggsoffa.
Doch dr Hannes halt`s jetzt nemme aus
Der muaß dapfer en a Krankahaus
Oh liabe Leit s`isch ällerhand
Er hot sei Glocka em a Gipsverband.
Drom daß fei Dir et au so goht
Wann irgendwo a Falla stoht
No hudl mr et ond dua mr schdät
Denn wenn`s en Schnapper duat, no isch z`schpät.
Denk z`erscht an dei hoikla Doil
An dei Glocka samt deim Glockasoil.
| 
